Lukas 3:7-14 (Jamita Advent)

Parbuehon Hamu Ma Na Tama, Paboa Naung Muba Rohamuna!

Patujolo

Dibagasan haporseaon ni Kristen, “Parbue na denggan” i do tanda ni hamubaon ni roha. Asa ndang holan marhite hata manang tangiang manopoti dosa (di gareja) tanda ni na marhamubaon ni roha. Ndang alani naung gabe parsidohot di angka ulaon ni huria, alai parbue ni hamubaon ni roha i ingkon tarida jala boi dipanghilalahon dongan jolma.

Hamubaon ni roha ndada holan hata sambing na hinatahon dijolo ni na torop. Alai, halak na porsea na marsitutu laho paubahon roha ingkon sian nasa rohana manopoti dosa di adopan ni Debata. Ai torop do halak na malo manghatahon dohot manghatindanghon hamubaon ni rohana, alai mansai godang dope angka naniulana na so dihalomohon ni Debata. Jala torop do halak na boi patuduhon denggan ni pangalahona di jolo ni dongan jolma, alai di pudi, di na so panagaman, ramun do pangalahona jala angka na jahat do ditahi rohana.

Di dok si Johannes Pandidi; “parbuehon hamu ma na tama, paboa naung muba rohamuna!”. (ayat 8a). Lapatanna, hamubaon ni roha ni sasahalak dipataridahon do i sian parulaon dohot pangalahona siganup ari. Jala songon i do nang Hata ni Tuhan Jesus Kristus; “ai ndang adong hau na denggan, na marparbuehon na roa, manang hau na roa na marparbuehon na denggan” (Luk. 6:43).

Sipahusorhusoron

Torop do halak Kristen na manghaporseai; pandidion na badia songon sada ‘jaminan’ haluaon. Di roha ni torop halak Kristen; molo dung do ibana tardidi, sitau malua ma ibana sian hamatean. Boha do tutu sasintongna? Toho do songon i?

Molo sinuan eme, pinarade ma bibit na denggan laho manamei, pinarade ma inganan (hauma) laho manuan marhite na mangatur pengairan tu tano i. Dung sadia leleng dipungka ma mamupuk dohot teratur, manghandangi asa unang ro bagudung dohot amporik manegai eme i. Molo dung diula sudena i, nunga terjamin denggan hasil ni gotilon? Boha molo ro udan na so marhasoan? Boha molo ro pinahan tu hauma i?

Molo pinarsikolahon sasahalak, anggiat gabe jolma na marhapistaran jala denggan parngoluonna. Tontu pinillit ma parsingkolaan na denggan jala na bermutu. Diihuthon ma perkembangan ni parsiajaranna, sinuru muse parsingkola i mangihuthon les. Denggan muse do parsingkola i marsiajar jala termasuk na pistar do ibana. Tammat do ibana jala nunga gabe sarjana. Nunga terjamin gabe denggan parngoluonna? Boha molo na mamillitmillit do ibana di parkarejoan? Boha molo ndang olo sarjana i mangula ulaon sian na mandasor? Boha molo ndang adong peluang kerja? Tarlumobi ma molo binereng torop ni sarjana di partingkian on na menganggur.

Didok Johannes Pandidi tu angka natorop i; “… so tung didok hamu di bagasan rohamuna: si Abraham do amanami! …” (ayat 8b). Na marlapatan, ndang gabe sada jaminan haluaon tu sasahalak ala pinompar ni si Abraham ibana. Suang songon i do nang tu halak Kristen i, Ndang gabe sada jaminan haluaon i di halak Kristen molo dung tardidi ibana. Ai na tardidi i, holan na patotophon dirina mardebatahon Debata Sitolusada i dope. Ihut tusi ingkon do sasahalak manghatindangkon haporseaonna. Halak naung manghatindangkon haporseaonna, i ma halak naung paradehon dirina mangoloi Tuhan i. I ma halak na olo mangulahon Hata ni Debata, halak na olo marparbue ngoluna.

Persoalanna, tung torop situtu do halak naung manjalo pandidion na badia jala naung  manghatindangkon haporseaon-na hape so diantusi lapatan ni pandidion i dohot na manghatindangkon haporseaon i. Tarida ma i sian pangalaho ni halak Kristen i di ngolu siganup ari. Tung torop do hala kristen i na sai mangulahon dosa, angka ulaon na so hinalomohon ni Debata.

Sada do dalan haruar tu angka halak Kristen sisongon i; dipauba ma rohana, dipungka ma marpabue. Halak naung paubahon rohana, ingkon tarida do i sian parbue ni ngoluna. Tatiru ma angka natorop na manungkun tu si Johannes Pandidi; “dia ma sibahenonnami?”  Sungkunsungkun on, pataridahon na adong do sada tekad sian angka natorop i laho paubahon rohana. Nang hita pe, ingkon dohot do manungkun tu Debata; ¸”Ale Debata, dia ma sibahenonnami?”. Dia do sibahenonta songon tanda ni hamubaon ni rohanta? Alus ni si Johannes na parjolo tu jolma na torop: Holong maradophon dongan jolma ndada holan di hata manang holan hatahata sambing, alai marhite pangulaon. Ndang dipatorang si Johannes Pandidi holong i marhite teori alai marhite praktek do. Holong i ndang sihatahonhon alai siulahononhon (ayat 11).

Alus ni ni si Johannes na paduahon tu angka sijalobeo: Unang ma mardosa halak dibagasan manang marhite ulaonna (parkarejoanna/jabatanna). Ganup jolma ingkon do mangan, ganup jolma ingkon do mangula asa mangan. Alai unang ma dipangke ulaonna manang jabatanna i laho mangulahon dosa (ayat 12-13).

Alus ni ni si Johannes na patoluhon tu angka soldadu: Unang ma disalahgunahon huaso na adong laho manusai dohot na mandobo halak. Dihasabamhon ma gajina be (ayat 14).

Boha do hita? Holan di hata do holong na dihita i nasai laon, so hea taulahon? Naung tasalahgunahon do ulaonta dohot jabatanta laho mangulahon dosa? Antong tapauba ma rohanta, taparbuehon ma na tama, asa hot di hita haluaon naung pinasahat ni Debata i na tu hita i! Taingot ma: nunga pola ampe tangke tu daling ni angka hau!

Pdt. Anthony Tobing

Postingan Terkait