“Bukan kamu yang memilih Aku, tetapi akulah yang memilih kamu. Dan Aku telah menetapkan kamu, supaya kamu pergi dan menghasilkan buah dan buahmu itu tetap, supaya apa yang kamu minta kepada Bapa dalam nama-Ku, diberikan-Nya kepadamu" Yohanes 15:16

Selasa, 13 Desember 2011

Yesaya 7:10-14


Nunga Dilehon Debata Dalan Haluaon Tu Hita

Patujolo
Di turpuk on, harajaon Israel nunga tarbagi gabe dua harajaon. Harajaon Juda (Selatan) dohot harajaon Israel (Utara). Didok Debata Jahowa marhite panurirang Jesaya tu si Raja Ahas (raja ni Juda) na so jadi sangkap ni si Peka (raja ni Israel) dohot si Resin (raja ni Aram) na laho manggunturi harajaon Juda (ayat 1), ai donganan ni Debata do halak Juda. Didok Debata asa pangidoon ni si Ahas ma sada “tanda’ pangurupion ni Jahowa i, hape tangkang do roha ni si Ahas, dijugulhon do na so olo ibana marpangunsadean tu pangurupion ni Debata Jahowa i. Gabe laho do ibana mangido pangurupion tu Raja Assur. Dibahen i, tadingkonon ni Debata ma si Ahas nang dohot halak Juda. Gabe masa ma tutu hagunturon di hatiha i, humasusa ma pangisi ni Juda  nang dohot pangisi ni Israel (ayat 17-25). Alai dibagabagahon Debata Jahowa do, pabangkitonnonNa ma sada Raja di halak Juda dohot Isarel dohot tu saluhut bangso, na margoar “Immanuel” (ayat 14) na marlapatan; Debata do donganta.
           
Nunga dipatuduhon Debata Jahowa tu si Ahas sada dalan haluaon, i ma marhite na donganan ni Debata do nasida manongtong. Hape so olo si Ahas mangihuthon dalan na pinatuduhon ni Debata i, i ma dalan hangoluan. Gabe laho do ibana mamillit dalan na asing, marguru tu lomo ni rohana sandiri. Hape hasusaan dohot hamatean do jumpangna di dalan na pinilitna i.

Sipahusorhusoron
Molo lilu hita di sada huta na balga jala na ribur: songon Jakarta manang Medan, boi dope hita manungkun tu halak asa jumpang dalan sitopothononta i, ai torop dope halak na boi jumpangan jala boi sinungkun. Alai molo lilu hita di harangan manang di tombak ise ma sungkunonta? Boi marjea halak na lilu di sada harangan manang tombak. Di tingki sisongon i, mangalului dalan lapatanna ‘mangolu’ manang ‘mate’. Molo jumpang dalan – mangolu ma na lilu i. Molo so jumpang dalan i – mate ma na lilu i. Di tingki i ma hita gabe tarjolma; ai ringkot do hepe ‘dalan’ i.

Tuhan Jesus Kristus pe dihatahon taringot tu ‘dalan’ sisongon i. Di Mateus 7:13-14 didok Ibana, “Bongoti hamu ma harbangan na gogot i; ai ruak do harbangan jala lambas do dalan na tu hamagoan, jala torop do angka na bongot sian i. Alai na hopit do ia harbangan jala gogot do dohot dalan na tu hangoluan, jala otik do halak na jumpangan i.”

Ditingki di hatahon Tuhan Jesus taringot tu “dalan hangoluan”, tandana i ma: gok hasusaan. Jala didok Ibana do tu angka siseanNa i asa pilliton nasida dalan na gok hasusaan i asa jumpang nasida hangoluan. Dalan na Pinatuduhon Debata Jahowa tu si Ahas, gok do hasusaanna. Ingkon holan halak Juda ma marporang dompak halak Israel dohot halak Aram. Alani dipillit si Ahas ma dalan na asing, marhite mangido pangurupion sian harajaon Assur asa tung neang didok rohana nasida marporang. Ai harajaon Assur, sada harajaon na balga jala torop situtu paranganna. Alai ihut tusi adong do syarat dilehon Raja Assur tu halak Juda: ingkon marsomba tu Debata ni halak Assur do saluhut halak Juda.

Nang tu hita pe dipartingkian on, sai ungkap do ‘dalan’ di pangoluonta on. Adong do i dalan na mansai tabo dalanan jala bolusan alai manghorhon hamatean. Adong muse dalan na tung rahis jala maol dalanan dohot bolusan alai di ujung ni dalan i jumpang ma hasonangan. Na dua horong dalan i nunga rade dijolonta, tinggal hita nama mamillit dalan sidalanonta i. Na mura jala tabo dalanan i do manang na maol i, na tu hamatean i do manang na tu hasonangan i.

Somalna, tumorop do halak na mangihuthon Raja Ahas na mamillit dalan na tabo bolusan. Mansai otik do bilangan ni halak na olo mangihuthon pandok ni Tuhan Jesus Kristus i asa mamolus sian dalan na gogot i. Ai tung torop do halak naeng marsonangsonang di ngoluna alai tung so olo manghalojahon dirina. Didok roha nasida, “molo boi do sian dalan na hatop boasa olo mamillit dalan na lambat? Molo boi do marsonangsonang so pola loja iba, boasa olo lojaan diriniba?”  Alani i, torop ma bilangan ni angka panangko, angka koruptor, angka siula hajahaton. Tung mansai otik do bilangan ni halak na ‘jujur’, halak na manghasabamhon na adong diibana.

Nunga dilehon Debata tu hita sada “dalan” marhite AnakNa, Tuhan Jesus Kristus, na gabe sasadasa dalan di hita manopot hasongan i. Hasonangan di ngolu sadarion dohot hasonangan di hangoluan sogot. Alai songon na nidok ni Tuhan Jesus sandiri, rahis jala maol do dalan na pinatuduhonNa i alai Ibana do na margoar “Immanuel”, molo Ibana do na taihuthon, sai donganan ni Debata do hita molo pe masa dihagogotan bolon. Tung so olo do Ibana manadingkon hita.

Persoalanna, olo do hita mandalani dohot mamolusi dalan na gogot i? olo do hita manambai bilangan ni halak na ‘jujur’ i? Molo hasonangan do na tajalahi di ngolunta on, taingot ma hata ni Tuhan Jesus Kristus i, “Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu!” (Joh. 14:6). Alani i, taihuthon ma Tuhanta Jesus Kristus saleleng ni lelengna, asa jumpang hita hasonangan i. Ai Ibana sandiri do na mandok, “Ro ma hamu tu Ahu, hamu angka na loja jala na sorat, asa hupasonang hamu!” (Mat. 11:28). ….. Amen ……

Pdt. Anthony L Tobing

Postingan Terkait



0 komentar: